Vila de Bouzas
Patrimonio cultural
Na visita á vila de Bouzas poderase observar e coñecer a estrutura urbana e a vida cotiá dun barrio que é unha antiga vila mariñeira.
O percorrido comeza no mercado da vila, á beira da antiga praia ocupada agora pola industria naval, e alí, ademais de visitar os postos de peixe, carne e froitas, aproveitando as fotos antigas da vila que adornan o mercado, falamos de como era Bouzas hai máis de cen anos e como variou co paso do tempo.
Tras saír do mercado, dirixímonos á Alameda –antigo campo das redes-e hoxe lugar de lecer e paseo; aquí falamos da importancia dos espazos públicos de lecer no medio urbano, da ocupación dos espazos abertos e dos lugares de encontro da xente da vila.
Deixamos a Alameda e adentrámonos nas rúas do casco histórico, onde descubrimos a estrutura urbana dunha vila antiga, coas súas rúas estreitas, os diferentes tipos de edificacións, os nomes das rúas, …
A visita remata no paseo da praia, tras pasar pola igrexa de S. Miguel Bouzas, do século XVII, na que identificamos elementos propios destas edificacións. No paseo observamos e recoñecemos as diferentes industrias derivadas das actividades relacionadas co mar –estaleiros, terminal de transbordadores, embarcacións tradicionais. Falamos tamén de actividades propias e identificatorias da vila –a tradición mariñeira, o Rápido de Bouzas, os faluchos…
Na praia, se o tempo o permite, merendamos antes de voltar ao cole.
- Podes ver aqui unha galería de imaxes antigas de Bouzas
- Podes ver aqui unha breve historia da vila de Bouzas
Obxectivos xerais
Coñecer de cerca unha antiga vila mariñeira, a súa evolución e as actividades que se desenvolven nela na actualidade.
Obxectivos específicos
Visitar o mercado e observar os distintos tipos de alimentos que se venden nel.
Achegarse ás rúas e espazos públicos da antiga vila e observar como era e como variou co paso do tempo.
Descubrir costumes e actividades características da zona.
Gozar do paseo pola praia e valorar a importancia da natureza na vida cidadá.
